الاسم المشطوب (الابنودى) اسامة

اكشف غطا وشك ومزع القناع
بلا حكومة ..بلا لكومة
بلا بطولة ..بلا بتاع
يا اسمر يا ابو القلب حديد
ياللى واجهت الموت ..فى كل اتساع
يا اسمر يا ابو الوجة العنيد
يا مصرى ولحد النخاع
...كلة طلع كلام يا خال
والحال ..رجع تانى الحال
اتارى الحرام ..هودة الحلال
واتارى الهدى ..هودة الضلال
شموا نفسكم من جديد
والمرة دى
بدمك انت يا بطل ...مع الاسف
وبعجنة اللحم اللى تتسمى الهيد
ويعملوها عيد بليد
تعرفيش غيرة من الصحف
واعترف ...
العيد بييجى
لاجل ما تموت من جديد
ولو ان موتك ريح بيغلب الرياح
لكنة ما حركش لية اسن الحياة ؟
ويا صاخبى
ما حركش لية الم الجراح
راح اللى راح
فلا انتظار ولا امل
الحرب خلصت يا بطل
والفرحة هبت فى الوطن يا صاحبى
من كل اتجاة
وزى ما قالوا طلع نور الصباح
ورفرف العلم العظيم العالى ..
على كل الجباة
لكنة
لية من غير حياة ؟
والنصر لية على رقاب كل اللى عملوة ..اتكا؟
ولية فى ارض المعركة
نسينا كل اللى بلغناة
بالمعاناة ؟
وبالعرق والفخار والبكا ؟
لما يا صاحبى على الحلم ...اللى ضاع
ونصرك اللى راح
وما عادلوش شهود
وماعادش داخل الحدود
غير اللى سمسر
وغير اللى قرقر
واللى وفر ...واللى باع
###
اللى هوى الوطن .....هوى
بالعشق ولع وانكوى
من قبل ما يفتح ....زوى
يا احلى ابناء الوطن
نرحل عليل ....بلا دوا
ترحل وحيد مجروح حزين
........نرحل سوا
نرحل سوا انا وانت والوطن الحبيب
ونسيبها للوطن الغريب
ونسيبها للوطن المريب
لديب ..بيحرس الجياع
والوهم اذا كشكش
بيزيد اتساع
وانت العريس اللى بنيت المجد
بايدك الجمال
وبقيت دريس طاو فى الخيال
وكئن حربك النبيلة
لعبة لعبوها العيال
لعبوها ع الساكت
اتمرمغت الصفحة اللى فيها اسمك
حدوتة
وسط الحواديت تاهت
الاسم مشطوب
والتاريخ باهت
ما فضلشى منة شئ يا عبد العاطى
لما العو دباباتة بعدت عن سينا
نسونا .........فنسينا
والاسم
كان لازم فى سكة الخيانة
يتردم
واللى كتب عليك ندم
واللى وقف جنبك ندم
اضطر يفضح لعبة التبديد
وحاصروة بالوصم والتهديد
صبح الشريف موصوم
هوة الشريف اللى تملى يتوصم
وبقى السليم مجزوم
يستعملوا وياة يا خال
........لغة الجزم
وبقى الجبان صنديد
فارحل حزين مظلوم
ارحل سفية موصوم
ارحل مريض ساكت
ارحل الى ابعد بعيد

مصر المهيبة بتنحدر للواطى
هل كنت تتخيل فى يوم
السرعة دى فى الموت يا عبد العاطى (صائد الدبابات فى حرب اكتوبر )
حتى وانت قصاد صفوف الدبابات
سامحنى
انا ما اعرفشى كام عندك من
الصبيان والبنات
هل كنت تتخيل خيانة الوطن
هل كنت تتخيل عبير هذا الزمن ؟
وهو صاعد للعلا نتن
وقول بحق
ان كان قلبك خاف
والار..بى جية
مسنود على الاكتاف
ساعة اغتيال عساف
وهل خطر على البال يا عبد العاطى
ان الخيانة حتسكن الاتى ؟
وان ملعوب الانفاق ملعوب
وان اكتوبر حيتباع ويا مصر
الاتنين ........فى سوق العصر
والمؤمنين
حيطردوا من صيغة المستقبل
ويصعد الخاطى \
دلوقتى اية اللى مضيق
صدرك الوسيع
وبتفهم ازاى الفروق
بين اللى اشترى الوطن الاسير
والبيع ؟
النصر تمنة اشتروا بية قصر
تمن الوطن
اذا لدخول السمسرة
ماكانتش حرب
ما كانش نصر
واللى رفضناة لاجل نتقدم
حدفنا بعيد ورا

ما تقولشى زىى كان وكان
كان حيلة لاجل يموت فقيرها
فى طابور الهوان
وطنك يا صاحبى كان زمان
واللى احنا فية
زمن العفاريت السمان
اصمد يا صاحبى لموتك العبثى
باعوا الوطن يا صاحبى بالمجان
مجان لكن منقدروش اتمان
ما راح زمان (الشاذلى والجمسى )
وشمس سينا يوم ما عششت
صدرك العريان
غابت فانسى الحرب
يا غلبان
اعداء وطنا صاروا احبابة
_مستمتعين بالوطن والوقت خان الوقت _
بيسلكوا وكأنهم اصحابة
انت العدو دلوقت
انت نشاز اللحن
اما احنا يا بطلى الحزين
فمدينا ليهم للحياة
شريان ورا شريان
زعيقى وسط الخلق
زى سكاتى
وتفاؤلى بقى جزء من احباطى
اتغيرت كل العقول
واتبدلت كل الفصول
واتعفرت كل الشموس
واتغبرت كل النفوس
وزى ما تقول قول
اسمك بهت
وكأن عمرة ما كان
اتباع كأنة
بضاعة فى الدكان
فى الانفتاح على عورة الاوطان
ادى الجناة ابرار
وانت الخاطى
وانت غلطة الوطن
فى صفقة الشيطان
............................
عذرا القصيدة طويلة جدا
ولكنى اردت القاء الضوء على شاعرنا الكبير
عبد الرحمن الابنودى

» من حقك ..من حقى "اسامة "
» الى حبيبتى " اسامة "
» سؤال " اسامة "
» ثائرة " اسامة "
» نغم العمر " اسامة "